Ferland Mendy ka rikthyer papritur rëndësinë e tij te Real Madridi, në një moment kur skuadra ka nevojë urgjente për siguri në krahun e majtë. Me Álvaro Carreras të dëmtuar dhe me Fran García që nuk gëzon besimin e trajnerit Álvaro Arbeloa, francezi ka parë një dritare të artë dhe është rikthyer në skenë.
Pas 27 javësh në La Liga, Mendy u aktivizua më në fund si titullar këtë sezon dhe lajmi më i mirë për madrilenët është se ai e mbylli ndeshjen pa probleme fizike, në një fushë të vështirë si Balaídos, ku Reali u detyrua të vuante deri në minutat e fundit. Arbeloa pranoi se kishte një dozë rreziku në aktivizimin e tij pas shumë muajsh pa luajtur, por e përdori menjëherë si shembull për skuadrën:
“Na duhen lojtarë si ai, që shtyjnë përpara.”
Rikthimi i Mendy shihet si një plus i madh pikërisht për atë që vjen tani: Manchester City. Përballë skuadrës së Guardiolës, që pritet të godasë fort nga ai krah me shpejtësi dhe alternativa në sulm, përvoja dhe qetësia e francezit mund të jenë “antidoti” i duhur. Mendy njihet si një nga lojtarët që i shkon për shtat ndeshjeve të tilla, dhe në të shkuarën ka lënë gjurmë në përballjet epike të Realit ndaj Cityt.
Problemi i vetëm që e ka penguar shpesh ka qenë gjendja fizike. Pavarësisht vlerës së tij, mungesat e shpeshta e kanë bërë Mendy një “mall të rrallë” te Real Madridi. Statistikat flasin vetë: në 365 ditët e fundit ai kishte luajtur shumë pak, ndërsa gjatë periudhës së tij në Madrid ka humbur një numër të madh ndeshjesh për shkak të problemeve mjekësore.
Megjithatë, situata tani është ndryshe: Mendy është në dispozicion dhe duket i aftë të luajë 90 minuta. Me Carreras jashtë dhe Fran García i lënë në stol, francezi është shndërruar brenda pak ditësh në një kandidat serioz për të nisur titullar të mërkurën, në ndeshjen e parë ndaj Manchester Cityt.
