Barcelona është e vendosur të përforcojë repartin defensiv dhe tashmë ka identifikuar objektivin kryesor për afatin kalimtar të verës. Në “Camp Nou” shihet si nevojë urgjente afrimi i një mbrojtësi qendre cilësor me këmbë të majtë.
Drejtuesit e klubit janë të vetëdijshëm se skuadra ka nevojë për ndërhyrje të targetuara në merkato. Sipas gazetarit Gianluigi Longari, në krye të listës së dëshirave të Barcelonës është mbrojtësi i Interit, Alessandro Bastoni.
Raportohet se 26-vjeçari italian është i kënaqur me rolin e tij tek Interi, por interesi i klubit katalanas nuk ka kaluar pa u vënë re. Nëse do të mbërrinte një ofertë konkrete, Bastoni është i gatshëm ta shqyrtojë seriozisht hapin e ardhshëm në karrierën e tij.
Një operacion i tillë pritet të jetë shumë i kushtueshëm. Sipas Transfermarkt, vlera e Bastonit në treg është 80 milionë euro, ndërsa kontrata e tij me klubin zikaltër është e vlefshme deri në verën e vitit 2028.
