Kursi i këmbimit të Euros me Lekun po vazhdon rënien edhe gjatë kësaj jave, duke arritur rekorde të reja historike. Sipas kursit zyrtar të kursit të këmbimit të Bankës së Shqipërisë, Euro u këmbye sot me 96.05 lekë, niveli më i ulët i regjistruar ndonjëherë.
Kursi ka rënë me 0.7% që nga fillimi i vitit dhe me 3.2% krahasuar të njëjtën periudhë të një viti më parë.
Kursi Euro-Lek po e thekson më shumë tendencën në rënie gjatë tremujorit të parë të vitit, një ecuri jo shumë e zakonshme kjo për këtë periudhë të vitit.
Sipas agjentëve të këmbimit valutor, rënia e Euros në javët e fundit nuk duket të jetë e lidhur me flukse të shtuara që vijnë nga jashtë vendit, por sidomos me këmbime të mëdha valutore që po kryejnë bizneset nga llogaritë e tyre, duke shitur Euro dhe duke blerë Lekë.
Sipas të njëjtave burime, edhe roli i Bankës së Shqipërisë në tregun valutor ka qenë më i vogël, duke bërë që kursi i këmbimit të rrjedhë më shumë në raportin natyral që përcaktojnë ekuilibrat e kërkesës dhe ofertës.
Në fakt, roli i Bankës së Shqipërisë në tregun valutor ka qenë shumë i rëndësishëm në dy vitet e fundit. Në mungesë të blerjeve të Bankës Qendrore, kursi i këmbimit Euro-Lek do të kishte zbritur në nivele edhe më të ulëta.
Sipas të dhënave zyrtare, për nëntë muajt e parë të vitit 2025 Banka e Shqipërisë ka blerë gjithsej 825.6 milionë euro në tregun e brendshëm valutor. Kjo është vlera më e lartë historike e blerjeve të Bankës së Shqipërisë në tregun valutor për këtë periudhë të vitit. Krahasuar me të njëjtën periudhë të një viti më parë, blerjet e valutës janë rritur me 52.2%.
Ndërkohë, për vitin 2026, Banka e Shqipërisë ka planifikuar t’i rrisë më tej blerjet e planifikuara të valutës në tregun e brendshëm dhe synon të blejë përmes ankandeve 330 – 450 milionë euro, me objektiv rritjen e rezervës valutore. Objektivi i blerjeve është rritur ndjeshëm krahasuar me projeksionet në intervalin 270-350 milionë euro të parashikuar për vitin 2025.
Megjithatë, misioni i FMN-së për Shqipërinë, në fund të vitit të kaluar, rekomandonte që Banka e Shqipërisë të pakësonte ndërhyrjet në kursin e këmbimit valutor. Sipas deklaratës së fundit, kursi i këmbimit duhet të veprojë si amortizator goditjesh me një fleksibilitet më të madh, ndërsa akumulimi i mëtejshëm i rezervave duhet të udhëhiqet nga një analizë kosto-përfitim.
FMN sugjeronte një qasje më të kujdesshme në rritjen e mëtejshme të rezervës valutore, duke theksuar se përfitimet nga akumulimi i rezervave duhet të peshohen ndaj kostove oportune në rritje, rreziqeve të normave të interesit dhe humbjeve të mundshme nga rivlerësimi valutor. /Monitor
