Kryedemokrati Sali Berisha e ka justifikuar sulmin me molotov ndaj ish-vilës së diktatorit Enver Hoxha si informacion të gabuar.
Pas përfundimit të protestës, Berisha tha se ishin policë të maskuar si protestues ata që dhanë informacionin keqdashës dhe të gabuar se në atë vilë jeton Edi Rama, dhe protestuesit nuk u përmbajtën.
“28 shkurti do të shkruhet në historinë e kryengritjes paqësore. Për 3 orë, marshimi juaj ishte marshimi i fitores, i shqiptarëve, i dinjitetit; ishte mesazhi më i madh që u dërguat miqve tanë në Europë dhe në botë. Ishte tmerri; i kallët tmerrin narkodiktatorit Edi Rama. Qytetarë dhe qytetare, në marshim e sipër, agjentë të infiltruar të policisë kriminale informuan kryengritësit se në shtëpinë e ish-diktatorit banon Edi Rama dhe kjo ngjalli një revoltë të fuqishme dhe bëri që t’i vërsuleshin asaj banese. Ishte një shpërthim ndaj Edi Ramës dhe jo ndaj ndërtesave. Por Edi Rama nuk banonte aty, ai banonte te vila e Mehmet Shehut. Tani, Edi, ne e dimë ku je, nuk fshihesh më. Arritëm një rekord të ri në protestën tonë, që do të thotë se asgjë nuk na ndal ne. Dënoj me forcën më të madhe dhunën, jashtë çdo lloj shkaku, të përdorur ndaj protestuesve”, tha Berisha.
