Një 41-vjeçar është vënë në pranga nga Policia e Krujës, pasi dyshohet se ka mashtruar një 24-vjeçare duke i marrë një shumë parash dhe më pas ka aplikuar për kredi në emër të saj.
Specialistët për Hetimin e Krimeve në Komisariatin e Policisë Krujë, menjëherë pas kallëzimit të bërë nga e reja, kanë nisur veprimet hetimore për zbardhjen e rastit. Si rezultat i hetimeve u bë i mundur identifikimi i autorit të dyshuar dhe, në bashkëpunim me shërbimet e DVP Durrës, kapja dhe arrestimi i tij.
Në pranga u vu shtetasi F. Xh., 41 vjeç, banues në Durrës, i dënuar më parë për veprën penale të mashtrimit.
Nga hetimet paraprake dyshohet se më 9 shkurt 2026, ai i ka marrë 550 mijë lekë 24-vjeçares, banuese në Krujë, nëpërmjet mashtrimit. Po ashtu, më 24 shkurt 2026, 41-vjeçari ka aplikuar dhe ka përfituar kredi në emër të saj, pranë një institucioni financiar.
Materialet procedurale i janë referuar Prokurorisë për veprime të mëtejshme.
