Sezonin e kaluar, duke llogaritur vetëm shpërblimet e UEFA-s (pa përfshirë të ardhurat shumë-milionëshe nga biletat), arka e klubit u mbush me mbi 136 milionë euro. Këtë vit, shifra ndalet në pak më shumë se 71 milionë euro. Ja sa i kushtoi Interit humbja e dyfishtë ndaj Bodo/Glimt.
Arritja në 1/8-at e Champions League ishte një mision shumë i rëndësishëm: për të konsoliduar praninë europiane pas dy finaleve në tre vitet e fundit, për të mos lëkundur besimin e skuadrës në kampionat, por mbi të gjitha për t’i dhënë arsye për buzëqeshje Oaktree, falë rreth 15 milionë eurove të ardhura të garantuara. Dhe potencialisht shumë, shumë më tepër.
Sepse sezonin e kaluar europian, që përfundoi me finalen katastrofike në Munih, Interi arkëtoi plot 136.6 milionë euro vetëm nga shpërblimet e ndara nga UEFA. Jo thjesht një “kursim” i zakonshëm, por një thesar i vërtetë, me të cilin klubi mund të balanconte financat dhe të investonte në merkato.
Inter, dështim në Champions League
Një shifër vërtet e jashtëzakonshme, shumë larg asaj që Interi ka siguruar këtë sezon nga UEFA, pasi aktualisht të ardhurat nga shpërblimet ndalen në 71.27 milionë euro. Kjo do të thotë një diferencë prej 65.33 milionë eurosh më pak nga një sezon në tjetrin.
Natyrisht, askush nuk thotë se skuadra e Chivu do të arrinte sërish në finale apo do të duhej të përsëriste fitimet prej 136 milionë eurosh, por eliminimi nga Bodo/Glimt vulos të paktën lamtumirën e Barella me shokë nga Champions League, dhe bilanci mbyllet pikërisht aty.
Një humbje e dyfishtë shumë e rëndë, jo vetëm për skuadrën (finalistja e parë e Champions League që nuk arrin në 1/8-at sezonin pasardhës që nga Chelsea 2012/13), por edhe për arkat e klubit, që tani shpreson të kufizojë humbjen e të ardhurave duke ringjallur garën për Scudetton dhe Coppa Italia.
