SL Benfica ka vendosur ta marrë me vete në Madrid Gianluca Prestianni, pavarësisht pezullimit të përkohshëm nga UEFA për një ndeshje, teksa vazhdon hetimi për fyerjet raciste të dyshuara ndaj Vinícius Júnior. Klubi portugez, që ka apeluar vendimin, dëshiron që argjentinasi të udhëtojë me pjesën tjetër të skuadrës.
Prania e tij në udhëtim mund të shihet si provokim, pasi ende nuk është e qartë nëse Benfica do ta ketë në stol apo ai do të duhet të ndjekë ndeshjen nga tribuna, gjë që mund të krijojë edhe shqetësime sigurie. Benfica ende nuk e ka publikuar listën zyrtare të të grumbulluarve, por raportohet se trajneri José Mourinho kërkon që Prestianni të jetë me ekipin.
Sipas raportimeve, Kylian Mbappé ka deklaruar se e ka dëgjuar personalisht Prestiannin duke e quajtur Viníciusin “majmun” në disa raste, ndërsa vetë lojtari i Benfikës i mohon akuzat. Në stërvitjen e së dielës, Prestianni u pa në qendër të vëmendjes dhe thuhet se u ka folur shokëve të ekipit, duke përsëritur se nuk ka bërë asnjë fyerje raciste dhe se është ndier i “ofenduar” nga akuzat, që sipas tij i kanë sjellë pasoja profesionale dhe sociale.
Në reagimin zyrtar, Benfica shprehu keqardhje për pezullimin e lojtarit ndërkohë që hetimi është ende në proces dhe njoftoi se ka bërë apel, duke ritheksuar angazhimin kundër çdo forme racizmi dhe diskriminimi.
