Negociatat midis Iranit dhe Shteteve të Bashkuara për programin bërthamor të Teheranit u hapën më 17 shkurt në Gjenevë, Zvicër, me ndërmjetësimin e Omanit. Këto bisedime jodirekte vijnë në një kohë kur tensionet ushtarake po rriten, duke u shoqëruar me lëvizje të trupave amerikane në Detin Arabik. Presidenti amerikan, Donald Trump, shprehu shqetësimin se mosarritja e një marrëveshjeje mund të çonte në sulme ushtarake. Ai theksoi rëndësinë e arritjes së një marëveshjeje për të shmangur përdorimin e forcës, duke aluduar për bombardime të mundshme të objekteve bërthamore të Iranit.
Ndërkohë, Gardë Revolucionare Islamike (IRGC) e Iranit nisi manovra detare në Ngushticën e Hormuzit për të testuar aftësitë operacionale të Marinës së saj, duke e cilësuar këtë një përgjigje ndaj “kërcënimeve të mundshme”. Trump ka treguar se do të jetë i përfshirë në bisedimet e Gjenevës në një mënyrë indirekte. Ky është randi i dytë i negociatave midis dy vendeve për këtë vit, pas bisedimeve të para që u zhvilluan më herët në Muskat.
Irani kërkon të përfitojë nga heqja e sanksioneve amerikane në këmbim të pranimit të një regjimi të rreptë inspektimesh bërthamore, por ka refuzuar të diskutojë lidhur me programin e tij raketor dhe mbështetje për grupet ‘proxy’ në rajon, çështje që administrata Trump kërkon të adresojë. Bisedimet po zhvillohen në konsullatën e Omanit, ku mesazhet po shkëmbehen mes ministrit iranian të Jashtëm, Abbas Araqchi, dhe të dërguarit të posaçëm amerikan, Steve Witkoff.
Situata mbetet delikate, me të dyja palët që shprehin nevojën për dialog, ndërsa mundësia e një konflikti ushtarak mbetet një shqetësim i vazhdueshëm. Bisedimet në Gjenevë përpiqen të adresojnë tensionet që kanë ngritur frikën për pasojat e një eskalimi të mundshëm në rajon.
