Antonio Conte nuk i fshehu nervat në konferencë për shtyp pas eliminimit të Napolit nga Kupa e Italisë ndaj Como-s. Trajneri u ndal fillimisht te arbitrat dhe VAR-i: “Le të mos vazhdojmë të flasim për këtë, sepse gjithmonë ka dikë që ankohet. Nuk është një sezon i mirë për arbitrat dhe VAR-in. Shpresoj të gjejnë mënyrën për t’u përmirësuar, sepse po ankohen të gjithë, jo vetëm disa individë. Duhet një hap përpara. Ashtu si përmirësojmë ekipet, është e drejtë që edhe Rocchi t’i përmirësojë arbitrat. Kjo nuk i bën mirë futbollit.”
Tema e dytë që Conte “mbylli” shpejt ishte ajo e Scudettos: “Jemi nëntë pikë mbrapa, kemi probleme serioze dhe ju flisni për Scudetto. Interi po ecën, është Milani, Juventusi, Roma, dhe edhe vetë Como. Për çfarë po flasim? Ne shkojmë ndeshje pas ndeshjeje, duke u përpjekur të jemi seriozë edhe në pyetje, edhe në komente.”
Më pas ai analizoi humbjen, duke theksuar mungesat dhe lodhjen: “Meritë djemve. Nuk ishte aspak e lehtë. Ata kishin skuadrën e plotë dhe 10 ditë pushim, ndërsa ne luajtëm në Genoa tre ditë më parë, e mbyllëm me 10 lojtarë dhe humbëm edhe një lojtar kyç si McTominay. Lojtarët meritojnë lavdërim, sepse po e tejkalojmë potencialin aktual. Sot kemi pak ‘burime’ dhe nuk lidhen me ambiciet që do të donim. Po bëjmë gjëra të shkëlqyera dhe, në fund, edhe ne mund të ishim kualifikuar si ata te penalltitë. Është zhgënjyese, sepse ka vite kur do të bësh më shumë, por po e bëjmë me këtë skuadër që kemi. Çdo ekip do ta kishte të vështirë në situatën tonë. Faleminderit tifozëve që e vlerësojnë angazhimin: ishim një hap larg kualifikimit.”
I pyetur për arsyen e shumë dëmtimeve, Conte tha se është e pamundur t’i parashikosh: “Si t’i parashikosh dëmtimet e Di Lorenzo-s, ose Lukaku-t dhe De Bruyne-s që kanë shkëputje tendinash? Ose Gilmour-in me problemet e pubalgjisë? Pa përmendur Anguissa-n… Duhet të shkojmë në faltore e të lutemi. Janë dëmtime aq të rënda sa zgjasin gjithë vitin. Kur të mungojnë 6-7 lojtarë kyç, luajnë gjithmonë të njëjtët dhe pastaj humb edhe të tjerë si McTominay e Rrahmani. Janë humbje të rënda sepse i shtohen mungesave afatgjata. Në merkato më thanë se s’mund të bëhej asgjë veçse nëse ishte falas, ndaj morëm dy lojtarë për të na ndihmuar. Por jam i bindur se po bëjmë diçka të jashtëzakonshme,” përfundoi ai.
