Real Madridi fitoi 2-0 në “Mestalla” ndaj Valencias dhe mori tri pikë të rëndësishme për të qëndruar në ndjekje të Barcelonës, duke mbetur vetëm një pikë pas kreut. Edhe pse loja nuk ishte në nivelin më të lartë, madrilenët u treguan pragmatikë dhe e mbyllën ndeshjen në momentet vendimtare.
Në një sfidë ku Arbeloa u detyrua të menaxhojë mungesat e Bellingham, Vinicius dhe Rodrygo, Reali u duk më i fortë fizikisht dhe më i kujdesshëm në prapavijë, por me pak ide në sulm për një pjesë të madhe të ndeshjes. Valencia u përpoq me intensitet dhe presion, por nuk arriti të krijojë rrezik real për gol.
Zhbllokimi erdhi në minutën e 65-të, kur Carreras shënoi për 0-1 pas asistit të Huijsen, duke i dhënë Realit qetësinë që i mungonte. Valencia kërkoi të reagojë, por pa sukses, ndërsa në fundin e takimit Mestalla u mbush me fishkëllima dhe thirrje kundër Corberán.
Në shtesë, Mbappé e vulosi fitoren me golin e 0-2 në minutën e 90+1, pas asistit të Diaz, duke mbyllur një mbrëmje ku Reali “u zgjua në kohë” për rezultatin, edhe pse performanca mbetet ende larg asaj që pritet nga madrilenët.
