Avokati Kujtim Cakrani, përfaqësues ligjor i ish-presidentit Ilir Meta, është dhunuar ditën e sotme në qytetin e Vlorës dhe aktualisht ndodhet i shtruar në repartin e kirurgjisë në Spitalin Rajonal të Vlorës, ku po merr ndihmë mjekësore.
Sipas të dhënave paraprake, ngjarja ka ndodhur në një pikë karburanti, ku Cakrani është konfliktuar me disa persona për shkak të një dere automjeti të lënë të hapur. Nga spitali, avokati ka deklaruar se fillimisht është provokuar nga dy të rinj dhe më pas është goditur nga pas me mjet prerës, pa asnjë shkak të justifikuar. Ai ka mohuar kategorikisht të ketë pasur konflikte të mëparshme me autorët.
Në lidhje me ngjarjen ka reaguar ashpër ish-presidenti Ilir Meta, i cili e ka dënuar sulmin dhe ka kërkuar që autorët të identifikohen dhe të përballen me drejtësinë sa më shpejt.
“Dënoj me ashpërsi sulmin ndaj Avokatit Kujtim Cakrani nga dy banditë, të cilët jo vetëm duhet të identifikohen, por edhe të vendosen para ligjit sa më shpejt. Nuk është hera e parë që sulmohen avokatët, sepse jetojmë në një regjim ku ata konsiderohen jo vetëm të panevojshëm, por edhe problematikë”, deklaron Meta.
Ish-kreu i shtetit ka shprehur gjithashtu solidaritet të plotë me avokatin Cakrani, familjen e tij dhe trupën e avokatëve në të gjithë vendin, duke e cilësuar ngjarjen si një tjetër tregues shqetësues të klimës së pasigurisë dhe presionit ndaj profesionistëve të drejtësisë.
Policia po punon për zbardhjen e plotë të rrethanave të ngjarjes dhe identifikimin e autorëve.
