Një sherr i dhunshëm u regjistrua në orët e para të ditës së sotme në fshatin Gjashtë të Sarandës ku të përfshirë ishin 12 persona, përfshirë këtu efektivë policie. Sipas burimeve për media, i gjithë konflikti ka filluar për një borxh dhe më pas debati ka degraduar në përdorimin e armëve dhe sendeve të forta. Sipas News24, AMP (Agjencia e Mbikqyrjes Policore) janë ekzekutuar 8 urdhërarreste, 2 persona janë shpallur në kërkim dhe 2 të tjerë janë lënë të lirë. Personat e përfshirë në konflikt: Alvaro Sulejmani, efektiv i Policisë Himarë;Kidi Sulejmani, efektiv i Policisë Kufitare Sarandë;Redi Sulejmani, student në Akademinë e Policisë Tiranë;(Alavro, Kidi dhe Redi Sulejmani, të tre vëllezër)Ergis Sulejmani, efektiv i Policisë Kufitare Sarandë;Igli Duka, ish-efektiv i Policisë Sarandë, i njohur për një arrestim në Skoci për kultivim të lëndëve narkotike.
Nga ky konflikt kanë mbetur të plagosur dy vëllezërit Enea dhe Albi Nexhipi, të cilët pasi kanë shkuar në spital për të marrë ndihmë mjekësore, jane shoqëruar për në komisariat. Gjithashtu në sherr kanë qenë të përfshirë dhe persona të tjerë të fisit Sulejmani dhe Duka si dhe një person me mbiemrin Cocka. Në komisariat jane dorëzuar vullnetarisht Alvaro Sulejmani, Mihal Sulejmani dhe Beqir Cocka. Lidhur me këtë ngjarje, është pezulluar nga puna dhe Arben Ismalaj me detyrë trupë shërbimi në Seksionin e Rendit në Komisariatin e Policisë Sarandë. Ismalaj u pezullua nga detyra pas disa pamjeve të publikuara në rrjete sociale nga sherri ndërsa inspektori mbante në dorë armën e shërbimit.
