Një person ka humbur ndjenjat gjatë protestave të sotme në Rrjoll të Velipojës, ku vijojnë përplasjet mes banorëve të zonës dhe forcave të policisë lidhur me lejen për ndërtimin e një resorti.
Banorët kundërshtojnë projektin, duke pretenduar se po u grabitet prona, për të cilën thonë se disponojnë certifikata pronësie.
Që prej ditës së hënë, në zonë janë zhvilluar protesta, të cilat janë shoqëruar edhe me arrestime nga policia. Situata mbetet e tensionuar, ndërsa banorët kërkojnë ndalimin e punimeve dhe sqarim ligjor mbi pronësinë e tokës.
Projekti, në fjalë parashikon ndërtimin e një kompleksi turistik në një sipërfaqe prej rreth 146 hektarësh në zonën ranore pranë Velipojës. Sipas dokumentacionit të planit zhvillimor, masterplani përfshin 33 struktura akomoduese dhe shërbimi me 3 deri në 10 kate mbi tokë dhe 1 kat nëntokë, një strukturë hoteli, si edhe disa struktura social-kulturore. Totali i sipërfaqes së ndërtimit mbi tokë parashikohet të jetë mbi 400 mijë metra katrorë.
Sipas përshkrimit të projektit, kompleksi synon të ofrojë funksione të ndryshme turistike dhe shërbime për vizitorët.
