Marcus Rashford nuk ka ndërmend të kthehet te Manchester United, pasi nuk beson më në suksesin e ekipit. Sulmuesi anglez po këmbëngul për një transferim të përhershëm te Barcelona, me synimin kryesor fitimin e trofeve.
Detajet: Sipas informacioneve ekskluzive nga The Touchline, anësori 28-vjeçar i Manchester United ka marrë një vendim përfundimtar dhe të qartë në favor të Barcelonës, duke besuar se shanset për të fituar trofe në Katalonjë janë shumë më të mëdha sesa në “Old Trafford”.
Burimi shton se Rashford ka krijuar edhe një marrëdhënie të mirë me trajnerin e Barcelonës, Hansi Flick, të cilin e sheh si një figurë të besueshme dhe si njeriun e duhur për ta ndihmuar të arrijë nivelin e tij të radhës.
Huazimi i Rashford te Barcelona përfundon këtë verë, por Blaugranat po shqyrtojnë të gjitha opsionet për ta mbajtur përfundimisht lojtarin në skuadër.
Këtë sezon, Rashford ka zhvilluar 32 ndeshje me Barcelonën, duke shënuar 10 gola dhe duke dhënë 12 asistime. Vlera e tij aktuale në treg vlerësohet rreth 40 milionë euro, sipas Transfermarkt.
