Aktori i njohur Fitim Makashi, babai i këngëtarit Redon Makashi, ka ndërruar jetë në moshën 82-vjeçare. Sipas reporteve nga gazetarja Sara Hila e Top Channel, ai humbi betejën për jetën këtë pasdite, ndërsa ndodhej në spital.
Fitim Makashi lindi më 10 prill 1944 në Gjirokastër dhe u shqua si një figurë e rëndësishme në artin shqiptar. Pas përfundimit të shkollës së mesme, ai nisi studimet për aktor në Institutin e Lartë të Arteve në Tiranë, të cilat i përfundoi në vitin 1967. Pas diplomimit, ai punoi për disa vite si pedagog në ILA, ndërkohë që u angazhua gjithashtu në Teatrin Popullor (sot i njohur si TK). Në vitin 1978, ai u emërua zyrtarisht aktor në këtë teatër, ku njëherazi vazhdoi karrierën e tij artistike për afërsisht 12 vjet deri në mes të viteve ’90.
Gjatë karrierës së tij në teatër, Makashi ka interpretuar një sërë rolesh të paharrueshme. Disa nga këto përfshijnë rolin e Pedagogut në “Pas provimit të dytë”, Drejtorin e fermës në “Ata që duhen”, dhe rolin e Benit në “Vdekja e një komisioneri”. Një tjetër rol të rëndësishëm e kishte a i Bedriut në “Dritat e skenës”, si dhe Telhai në “Besa”. Roli i tij i fundit në teatër ishte ai i Filipoviç-it në shfaqjen “Inspektori”.
Makashi filloi karrierën e tij filmike në vitin 1967 me një rol episodik në “Dueli i heshtur”. Ai vazhdoi të luante në filma të njohur si “Prita” (1968), “Njësiti gueril” (1969), “Ndërgjegja” (1972) dhe “Rugicat që kërkonin diell” (1975), ndër të tjerë. Roli i tij në film ishte po aq mbresëlënës sa ato në teatër, duke kontribuar në formimin e identitetit kulturor shqiptar.
Vdekja e Fitim Makashit është një humbje e madhe për botën e artit dhe kulturës shqiptare, duke lënë pas një trashëgimi të vyer artistike të cilën do të kujtojnë brezat e ardhshëm.
