Një operator turistik australian është përballur me kritika dhe pasoja serioze, pasi publikoi një artikull të gjeneruar nga inteligjenca artificiale që i udhëzoi turistët drejt një destinacioni të izoluar në Tasmania për të gjetur burime termale që në realitet nuk ekzistojnë.
Artikulli, i publikuar në faqen Tasmania Tours, rendiste të ashtuquajturat Weldborough Hot Springs si një nga “7 përvojat më të mira të burimeve të nxehura në Tasmania për vitin 2026”. Në fakt, në Weldborough nuk ka asnjë burim termal dhe turistët që udhëtuan drejt zonës u përballën vetëm me një lumë të ftohtë, larg çdo ideje për relaks.
Kristy Probert, pronare e një pub-i pranë zonës, i tha ABC se një grup prej 24 turistësh mbërriti aty pas një udhëtimi të gjatë nga kontinenti, duke kërkuar burimet e përshkruara në artikull. Ajo u kishte thënë me shaka se, nëse i gjenin burimet, do t’i ftonte për një birrë – por grupi nuk u kthye më.
Artikulli përfshinte Weldborough përkrah destinacioneve reale si Hastings Caves, por përmbante edhe përshkrime të dyshimta dhe kontradiktore, përfshirë Liaweenee, e njohur si vendi më i ftohtë në Australi, si një zonë relaksi termal.
Tasmania Tours kishte përdorur inteligjencën artificiale për të gjeneruar përmbajtje marketingu, një praktikë gjithnjë e më e zakonshme në industrinë e turizmit për të përballuar konkurrencën. Pronari i kompanisë, Scott Hennessy, pranoi se marketingu ishte kontraktuar te një palë e tretë që përdorte AI dhe se disa artikuj ishin publikuar “gabimisht”, ndërsa ai ndodhej jashtë vendit. “AI-ja jonë e ka bërë plotësisht gabim,” u shpreh ai.
Rasti nuk është i izoluar. Edhe më parë janë raportuar situata ku turistë në Peru dhe Japoni janë mashtruar nga informacion i pasaktë i gjeneruar nga AI, duke përfunduar në destinacione që nuk përputheshin me përshkrimet online.
Sipas një ankete të Booking.com, 89% e konsumatorëve shprehen se janë të gatshëm të përdorin AI për planifikimin e udhëtimeve në të ardhmen, çka tregon rritjen e besimit ndaj këtyre teknologjive. Megjithatë, ky rast ngre alarmin se përdorimi i pakontrolluar i inteligjencës artificiale mund të çojë në përhapjen e informacionit të rremë, duke lënë turistët të zhgënjyer sapo zbulojnë realitetin pas mbërritjes.
