Çmimi i arit ka shënuar një rekord historik, duke kaluar për herë të parë pragun e 5 mijë dollarëve amerikanë për ons, në një klimë të shtuar pasigurie politike dhe ekonomike globale.
Sipas të dhënave të Bloomberg, metali i çmuar u rrit me 1.8% gjatë së hënës, duke arritur në 5,078 dollarë për ons.
Rritja e fortë e arit vjen në një moment tensioni të lartë ndërkombëtar, pas deklaratave dhe politikave të paparashikueshme të presidentit amerikan Donald Trump, të cilat kanë shtyrë investitorët të orientohen drejt aseteve të sigurta.
Ndër faktorët kryesorë që ndikuan në rritjen e çmimit janë kërcënimet për tarifa të reja ndaj Kanadasë dhe përplasjet diplomatike me Evropën lidhur me të ardhmen e Grenlandës.
Ndërkohë, tregjet financiare globale janë tronditur edhe nga frika për një tjetër bllokim të qeverisë amerikane, pasi demokratët kanë kërcënuar të ndërpresin financimin për Departamentin e Sigurisë Kombëtare.
Sipas analistëve, ari ka shënuar një rritje prej rreth 90% që nga inaugurimi i Trump më shumë se një vit më parë, duke reflektuar shqetësimet në rritje për stabilitetin e dollarit amerikan dhe ekonominë globale.
