Presidenti i Republikës, Bajram Begaj, mbajti fjalën e tij gjatë ceremonisë së hapjes së vitit të ri gjyqësor, duke përkujtuar 10-vjetorin e reformës në drejtësi dhe sfidat e sistemit gjyqësor.
“Hapja e vitit gjyqësor nuk përfaqëson vetëm një kalendar pune, por shënon hapjen e një kapitulli të ri të së drejtës. Dhjetë vjet pas reformës, rezultatet janë të dukshme. Shumica e qytetarëve besojnë se epoka e pandëshkueshmërisë ka nisur të marrë fund,” tha Begaj.
Ai theksoi rëndësinë e pavarësisë së gjyqësorit, por me përgjegjësi:
“Pavarësia e drejtësisë është gur themeli i patjetërsueshëm. Nuk duhet kuptuar vetëm si ndarje formale nga pushteti politik, por duke garantuar drejtësi efektive. Nuk duhet të kthehet në vetëizolim institucional apo mungesë llogaridhënie. Gjykata Kushtetuese dhe Gjykata e Lartë kanë rol thelbësor për të krijuar norma dhe garantuar sigurinë juridike. Strukturat e sistemit mbeten të rëndësishme për vetëmenaxhimin, transparencën dhe llogaridhënien. Kërkohet përgjegjësi institucionale. Të garantohet siguria juridike dhe barazia para ligjit. Drejtësia e vonuar është drejtësi e mohuar. Zvarritjet procedurale, koha e gjatë e shqyrtimit të dosjeve dhe zbardhja e vonuar e vendimeve perceptojnë dhe nxisin impakt negativ tek qytetarët. Vetëm duke dhënë drejtësi dhe duke fituar besimin e qytetarëve, do kemi progres të qëndrueshëm edhe në rrugën drejt Bashkimit Evropian”.
Duke përmendur rastin e gjyqtarit Kalaja, Begaj nënvizoi rëndësinë e sigurisë:
“Vrasja e gjyqtarit Kalaja është një këmbanë alarmi për të gjithë ne. Siguria e jetës nuk është privilegj. Por pavarësia, siguria dhe respekti nuk mjaftojnë në vetvete. Çdo ditë duhet të flasim për qëllimin, Mbështes forcimin dhe funksionalitetin e sistemit të drejtësisë dhe ruajtjen e integritetit të tij,” tha Begaj.
