Parlamenti Evropian ka bërë një hap të rëndësishëm në mbrojtjen e të drejtave të pasagjerëve ajrorë, duke refuzuar me shumicë të madhe propozimet e Këshillit dhe Komisionit Evropian për ndryshimin e rregullave aktuale. Gjatë seancës plenare në Strasburg, 632 eurodeputetë votuan kundër këtyre propozimeve, me vetëm 15 në favor dhe 9 abstenime. Shkaku kryesor është shqetësimi se ndryshimet do të dobësonin mbrojtjen e konsumatorëve në një kohë kur numri i pasagjerëve dhe fluturimeve ka arritur nivele rekord.
Liberalizimi i tregut ajror të BE-së që nga viti 1997 ka sjellë rritje në itineraret dhe ulje të çmimeve, me numrin e pasagjerëve që pritet të kalojë 1.1 miliard në vitin 2024. Sidoqoftë, kjo rritje ka sjellë edhe një shqetësim të madh lidhur me vonesat, anulimet dhe humbjet e bagazheve. Linjat ajrore, përmes shoqatës “Airlines for Europe”, kanë bërë presion për ndryshime, duke argumentuar për rritjen e kostove operative.
Sipas rregullave të tanishme, pasagjerët kanë të drejtë të kompensohen nga 250 deri në 600 euro për vonesa prej më shumë se tre orësh. Propozimet e Këshillit për të rritur këtë limit dhe për të lehtësuar tarifat e bagazhit kanë hasur në kundërshtim të fortë nga Parlamenti, i cili ka vënë në dukje se çdo ndryshim do të përjashtonte rreth 80% të pasagjerëve nga kompensimi.
Eurodeputetët theksojnë gjithashtu nevojën për mbrojtjen e grupeve vulnerabël, duke kërkuar vende falas pranë shoqëruesve për fëmijët dhe procedura më të thjeshta për kompensim. Andrei Novakov, raportues në Parlament, shprehu se nuk do të ketë kompromis me të drejtat e pasagjerëve, duke theksuar se ka mënyra të tjera për të ndihmuar linjat ajrore pa cënimin e këtyre të drejtave.
Pas këtij vendimi, negocitat mes institucioneve evropiane pritet të rifillojnë, me shpresën për të arritur një marrëveshje të qëndrueshme mbi të drejat e pasagjerëve.
