Seria fituese e Barcelonës në sezonin 2025/26 ka marrë fund. Skuadra e Hansi Flick u mposht 2-1 nga Real Sociedad në Reale Arena, në një ndeshje ku katalanasit luajtën futboll cilësor, por paguan shtrenjtë mungesën e saktësisë para portës.
Barça arriti ta dërgonte topin në rrjetë plot tri herë, por të tre golat u anuluan. Goli i parë i Fermín López u shfuqizua për faull nga Dani Olmo, ndërsa golat e Frenkie de Jong dhe Lamine Yamal u anuluan për pozicion jashtë loje. Ndërkohë, Real Sociedad shfrytëzoi një aksion model, që u finalizua nga Mikel Oyarzabal me një goditje të pakapshme për Joan García, duke mbyllur pjesën e parë në avantazh 1-0.
Në fraksionin e dytë, Barcelona shtoi presionin ndaj portës së Álex Remiro-s, por shtyllat dhe pritjet vendimtare të portierit vendas i mohuan golin. Barazimi erdhi më në fund në minutën e 70-të, kur Marcus Rashford, i futur nga stoli, shënoi pas një krosimi të saktë nga Lamine Yamal.
Gëzimi i katalanasve zgjati pak, pasi vetëm pak minuta më vonë Gonçalo Guedes riktheu avantazhin për Sociedadin, duke ndezur atmosferën në Reale Arena. Ky gol e tronditi Barcelonën, e cila humbi qartësinë në lojë dhe nuk arriti të reagojë si në momentet e mëparshme.
Edhe pse Real Sociedad mbeti me një lojtar më pak në minutat e fundit pas kartonit të kuq për Carlos Soler, Barcelona nuk arriti të përfitonte dhe u largua pa pikë nga kjo transfertë.
Pavarësisht humbjes, Barcelona mbetet kryesuese e LaLigës, një pikë para Real Madridit, por seria e 11 fitoreve radhazi tashmë i përket së shkuarës.
