Pas mbledhjes së Grupit Teknik Ndërsektorial (GTN) në Durrës, është marrë vendimi për të asistuar menjëherë tre fëmijët dhe nënën e tyre, Blerina Basha, me ndihmë mjekësore dhe sociale. Ky vendim vjen si përgjigje ndaj nevojave të tyre pas diagnosikimit me sëmundjen infektive zgjebja. Fëmijët dhe nëna do të mbesin në spital derisa të kurohen, përpara se të vazhdojnë mbikëqyrjen sociale në banesën e tyre.
Drejtoresha e Shërbimit Social, Diola Xhango, në një komunikim për Top Channel, theksoi se gjatë mbledhjes përfaqësues nga Shërbimi Social, Policisë dhe organizatave jofitimprurëse u dakordësuan për një plan të koordinuar për forcimin dhe riintegrimin e familjes. Në përputhje me këtë plan, tre fëmijëve u është siguruar veshmbathje dhe medikamente të nevojshme, për të cilat pritet të ketë mjete të tjera nga organizatat Nisma ARSIS dhe World Vision.
Po ashtu, do të fillojë procesi i pasaportizimit dhe regjistrimit të familjes, e cila aktualisht është e regjistruar në Vau i Dejës, ndërsa nëna Blerina është nga Berati. Regjistrimi i ri si banorë të Durrësit do t’i japë mundësinë familjes për t’u përfshirë në skemat e strehimit social të bashkisë.
Ka gjithashtu plan për të gjetur një punë të rregullt për nënën përmes Zyrës së Punës, e cila do të sigurojë orar të përballueshëm për të mbajtur fëmijët. Aktualisht, ajo punon deri në 16 orë në ditë. Ajo do të ketë gjithashtu mbështetje psiko-sociale për t’u ndihmuar në përballimin e situatës.
Shërbimi Social do të monitorojë situatën familjare përmes kontrolleve të përditshme surprizë për të vlerësuar aftësinë e Blerinës për të ushtruar kujdestarinë ndaj fëmijëve. Ky proces ka si qëllim për të mbajtur familjen e bashkuar dhe për të garantuar interesin më të lartë të fëmijëve.
