Ekonomia e Kosovës ka përjetuar një zhvillim dinamik në dekadën e fundit, duke kaluar përmes fazave të ndryshme si rritje, ulje dhe kriza. Sipas të dhënave zyrtare, viti 2025 ka shënuar një rritje ekonomike prej 3.9%, me parashikime që kjo shifër të arrijë në 4.1%. Rritja mbështetet në konsum privat, rikuperimin e eksportit dhe zbutjen e inflacionit. Megjithatë, qytetarët vazhdojnë të ankohen për një përkeqësim të standardit të jetesës, për shkak të inflacionit që ka ulur fuqinë blerëse.
Shtrenjtimi i produkteve dhe shërbimeve, veçanërisht pas pandemisë COVID-19 dhe krizës në Ukrainë, ka detyruar shumë njerëz të heqin dorë nga shpenzimet e domosdoshme. Zyrtarët shpjegojnë se inflacioni ka lidhje me varësinë e vendit nga importet. Në përpjekje për të zbutur këtë problem, Qeveria ka rritur pagat në sektorin publik dhe ka nisur programin “Superpuna”, i cili ofron mbështetje për punëdhënësit në sektorin privat për gjashtë muaj.
Megjithatë, rritja e pagave nuk është reflektuar në përmirësimin e standardit të jetesës, për shkak të inflacionit të lartë. Numri i të punësuarve ka tejkaluar 400 mijë, por papunësia mbetet më e lartë tek gratë, të cilat përballen me sfida të veçanta për t’u angazhuar në tregun e punës, siç është mungesa e çerdheve, sidomos në zonat rurale.
Deri tani, Kosova ka një deficit të lartë tregtar, me importet që arrijnë në gjashtë miliardë euro, ndërsa eksportet janë nën një miliard. Investimet e huaja, kërkojnë një klimë më të favorshme dhe ulje të burokracisë për të inkurajuar investitorët. Edhe pse ka rritje të investimeve, shumë prej tyre vijnë nga diaspora që investon kryesisht në patundshmëri.
Remitencat nga diaspora kanë një ndikim të rëndësishëm në ekonominë e vendit, duke ndihmuar në uljen e varfërisë dhe rritjen e konsumit. Sidoqoftë, ekspertët sugjerojnë që ky fokus të kalojë në investime në projekte kapitale për të stimuluar zhvillimin e përgjithshëm ekonomik. Sfida mbetet përkthimi i rritjes ekonomike në mirëqenie reale përmes rritjes së prodhimit vendor dhe uljes së varësisë prej importeve.
