Rikthimi i João Cancelo te Barcelona duket shumë pranë finalizimit. Sipas Sport, mbrojtësi portugez pritet të mbërrijë nesër në kryeqytetin katalanas, ndërsa vizitat mjekësore janë planifikuar për të hënën, menjëherë pas përfundimit të Superkupës së Spanjës.
Raportohet se njoftimi zyrtar i transferimit do të bëhet pavarësisht rezultatit të finales, por vetëm pas përfundimit të ndeshjes. Barcelona nuk dëshiron që lajmi i Cancelos të shpërqendrojë vëmendjen nga sfida e madhe, ndaj edhe prezantimi i lojtarit do të zhvillohet pasi ekipi të kthehet në Barcelonë.
Sipas të njëjtit burim, vonesa nuk lidhet me ndonjë problem në negociata. Marrëveshja mes Barcelonës dhe Al Hilal thuhet se është plotësisht e mbyllur: Cancelo do të bashkohet me katalanasit në formë huazimi deri në fund të sezonit, me të gjitha kushtet e dakordësuara. Shtyrja lidhet vetëm me arsye logjistike.
Aktualisht, Cancelo ndodhet në Porto, ku po stërvitet individualisht dhe po pret të përfundojnë formalitetet. Për këtë arsye ai nuk do t’i bashkohet skuadrës në Arabinë Saudite, por pritet të nisë punën me shokët e rinj të martën, pas kryerjes së kontrolleve mjekësore.
Këtë sezon, Cancelo ka luajtur 6 ndeshje me Al Hilal, ka shënuar 1 gol dhe ka dhënë 2 asistime. Vlera e tij në treg vlerësohet rreth 10 milionë euro.
