Një tjetër shqiptar është kthyer në hero në Shtetet e Bashkuara të Amerikës. Bëhet fjalë për Brahim Gjokaj, me origjinë nga Tuzi dhe Dinosha, i cili rrezikoi jetën e tij duke u futur mes flakëve për të shpëtuar dhjetëra familje nga një zjarr që shpërtheu në një ndërtesë banimi në New York.
Në momentin kur zjarri kishte përfshirë ndërtesën dhe brenda ndodheshin ende banorë, Gjokaj hyri në ambientet e saj për t’i ndihmuar të dilnin jashtë. Në një video të publikuar në rrjetet sociale ai dëgjohet teksa thërriste vazhdimisht: “Dilni shpejt, dilni shpejt”.
Pas ngjarjes, në një prononcim të shkurtër për mediat vendase, ai u shpreh se në ato momente nuk kishte menduar për rrezikun që po i kanosej.
“Nuk më interesoi asgjë, thjesht doja që njerëzit të dilnin jashtë”, deklaroi ai.
