Qytetet bregdetare të Vlorës dhe Durrësit po përballen me mot të përkeqësuar, duke shkaktuar vështirësi në lundrimet detare.
Në Vlorë, era e fortë bregdetare fryn me shpejtësi rreth 15 metra për sekondë, duke krijuar dallgë deri në 1.5 metra. Për shkak të kushteve të vështira, mjetet e peshkimit dhe ato lundruese nuk kanë mundur të dalin në det, ndërsa trageti i linjës Vlorë–Brindisi ndodhet në radë, në det të hapur, për të shmangur përplasjet me kalatat e portit.
Ndërkohë, në Gjirin e Durrësit, era fryn nga drejtimi jug dhe jug-perëndim me forcë 5 ballë në gjirin e qytetit dhe 6–7 ballë në det të hapur. Flota e peshkimit qëndron në kalatë duke pritur përmirësimin e kushteve atmosferike. Mjetet e tjera lundruese, si tragetet apo anijet e tonazhit të lartë, nuk kanë hasur probleme. Mëngjesin e kësaj të diele, në Portin e Durrësit kanë mbërritur dy tragete nga Bari.
Autoritetet në të dy portet paralajmërojnë se moti i keq do të vazhdojë të ndikojë në lundrimet deri të martën, ndërsa situata monitorohet në mënyrë të vazhdueshme për sigurinë e detarëve dhe udhëtarëve.
