Ish-kryetari i Kuvendit të Kosovës, Nexhat Daci, ka ndërruar jetë. Lajmi u bë i ditur nga kryetari në detyrë i Kuvendit, Dimal Basha.
Nexhat Daci ishte një figurë e shquar e shkencës dhe politikës kosovare. Ai lindi në Tërnoc të Bujanocit, ku përfundoi arsimin fillor, ndërsa shkollën e mesme e kreu në Tërnoc dhe Leskovc. Studimet universitare në kimi i përfundoi në Universitetin e Beogradit, ku ndoqi edhe studimet pasuniversitare, ndërsa doktoratën e mbrojti në Universitetin e Zagrebit.
Karrierën akademike e nisi në Universitetin e Prishtinës në vitin 1966, si asistent, duke avancuar ndër vite deri në titullin profesor ordinar. Daci ishte aktiv në institucione dhe shoqata të njohura ndërkombëtare të kimisë, përfshirë Shoqatën Amerikane të Kimistëve dhe Akademinë Evropiane për Çështjet e Mjedisit.
Në vitin 1994, ai u zgjodh anëtar korrespondent i Akademisë së Shkencave dhe të Arteve të Kosovës, ku më vonë shërbeu si sekretar i përgjithshëm dhe kryetar.
Në jetën politike, Nexhat Daci ishte deputet i Kuvendit të Kosovës nga viti 2001 deri në vitin 2011 dhe mbajti detyrën e kryetarit të Kuvendit nga viti 2001 deri në 2006. Në vitin 2007, ai themeloi Lidhjen Demokratike të Dardanisë.
Në fushën shkencore, Daci la pas një trashëgimi të pasur me punime, projekte dhe tekste universitare, të përqendruara kryesisht në kiminë organike të qymyrit të Kosovës dhe mbrojtjen e mjedisit. Ai udhëhoqi projekte të rëndësishme për ndotjen e ujërave dhe kontribuoi në studime e monografi të njohura në fushën e kimisë dhe mjedisit.
Nexhat Daci do të kujtohet për kontributin e tij të çmuar në arsim, shkencë dhe politikë, si dhe për përkushtimin e vazhdueshëm në avancimin e shkencave natyrore dhe mbrojtjen e mjedisit, për të cilat u nderua me çmime dhe mirënjohje të shumta.
