Një lajm shqetësues ka ardhur nga Brazili, ku legjenda e futbollit Roberto Carlos është shtruar në spital pas zbulimit të problemeve në zemër. Ish-mbrojtësi i kombëtares braziliane, 52 vjeç, po përballet me një situatë shëndetësore që kërkoi ndërhyrje të menjëhershme mjekësore.
Sipas raportimeve, Roberto Carlos fillimisht po merrte trajtim për një dëmtim në këmbë, por gjatë kontrolleve rutinë mjekësore në Brazil, mjekët konstatuan probleme kardiake. Pas vlerësimeve të mëtejshme, u mor vendimi që ai të kryente ndërhyrje kirurgjikale.
Operacioni raportohet se ka qenë i suksesshëm dhe jeta e tij është jashtë rrezikut. Mjekët bëjnë të ditur se procedura shkoi normalisht, ndërsa Roberto Carlos ndodhet nën mbikëqyrje të specializuar deri në rikuperimin e plotë.
Roberto Carlos konsiderohet një nga mbrojtësit më të mëdhenj në historinë e futbollit. Ai ka regjistruar 127 paraqitje me Brazilin dhe ishte pjesë e skuadrës që fitoi Kupën e Botës 2002, duke lënë gjurmë të pashlyeshme në sport.
