Një plan për të inkurajuar alpinistët që të sjellin mbeturinat e tyre nga maja e Everestit po hiqet, pasi autoritetet nepaleze e cilësuan atë si një dështim. Në këtë sistem, alpinistëve u kërkohej të paguanin një depozitë prej 4,000 dollarësh, që do t’u jepet përsëri vetëm në rast se ata sillnin mbrapsht së paku 8 kg mbeturina. Megjithatë, pas 11 vjetësh, ky plan është anuluar pasi nuk ka treguar rezultate të dukshme në trajtimin e problemit të mbeturinave, që konsiderohet të jetë rreth 50 tonë në Everest.
Drejtori i Departamentit të Turizmit, Himal Gautam, tha se problemi i mbetjeve nuk është zgjidhur dhe se plani i depozitave ka qenë një ngarkesë administrative. Sipas tij, shumica e parave të depozitave janë kthyer gjatë viteve, duke sugjeruar se alpinistët e kanë sjellë mbeturinën e tyre, por kryesisht nga kampet më të ulta, ndryshe nga kampet më të larta ku ndodhen më shumë mbeturina.
Tshering Sherpa, kryetar i Komitetit të Kontrollit të Ndotjes në Sagarmatha, theksoi se alpinistët zakonisht sjellin vetëm shishe oksigjeni nga kampet më të larta, ndërsa gjëra si tende, kanaçe dhe paketa ushqimesh shpesh lihen pas. Ai bëri të ditur se çdo alpinist prodhon në mesatare deri në 12 kg mbeturina gjatë qëndrimit të tyre në mal.
Me ndryshimin e rregullave, një tarifë pastrimi që nuk do të kthehet do të përdoret për të vendosur një pikë kontrolli në Kampin Dy dhe për të angazhuar rangerë malorë që do të monitorojnë alpinistët në pjesët më të larta të malit. Kjo tarifë, e pritur të jetë edhe 4,000 dollarë, do të krijojë një fond për pastrimin dhe monitorimin e mbeturinave.
Autoriteteve nepaleze shpresojnë se ky plan i ri, në kuadër të një strategjie pesë-vjeçare për pastrimin e maleve, do të adresojë menjëherë problemin e mbeturinave në Everest. Çdo vit, numri i alpinistëve rritet, duke ngjallur shqetësim mbi qëndrueshmërinë e ngjitjeve malore, pasi ndihma e mbështetësve të tyre gjithashtu rrit sasinë e mbeturinave në mal.
