Më 23 dhjetor 2025, Agjencia e Ushqimit dhe Veterinarisë (AUV) e Kosovës njoftoi tërheqjen nga tregu të një sasie qumështi Aptamil, pasi në të u identifikua prania e bakteries Bacillus cereus.
Alarmi është ngritur përmes Komisionit Evropian dhe Sistemit të Veprimit të Shpejtë për Ushqimin dhe Ushqimin për Kafshë (RASFF). Sipas vlerësimit të AUV-së, niveli i rrezikut konsiderohet serioz, çka ka detyruar institucionin të ndërmarrë masa të menjëhershme për mbrojtjen e shëndetit të konsumatorëve.
Produkti i prekur është qumështi Aptamil me lot nr. 111444865, i importuar nga Holanda nga kompania “UNION SH.P.K.” me seli në Vushtrri. AUV ka nisur procese të detajuara të gjurmimit dhe tërheqjes së këtij produkti nga tregu, duke theksuar se monitorimi i vazhdueshëm i tregut dhe zinxhirit ushqimor mbetet prioritet.
Agjencia rithekson përkushtimin e saj për garantimin e ushqimit të sigurt për qytetarët e Kosovës, përmes zbatimit të masave parandaluese dhe kontrolluese në përputhje me standardet kombëtare dhe ndërkombëtare të sigurisë ushqimore.
Ndërkohë, AUV u bën thirrje qytetarëve që kanë blerë këtë produkt të mos e konsumojnë atë dhe të ndjekin udhëzimet e institucioneve kompetente. Ky veprim, sipas AUV-së, dëshmon angazhimin e vazhdueshëm për mbrojtjen e shëndetit publik dhe sigurimin e produkteve ushqimore të sigurta në treg.
