Prej më shumë se 30 vitesh, Hekuran Hoxha ka bërë një profesion nga pasioni i tij për fotografinë, duke ofruar shërbim për turistët që vizitojnë Drilonin në Tushemisht.
Me biçikletë dhe aparat fotografik në duar, ai është një figurë e njohur për vizitorët që shijojnë bukuritë e natyrës dhe historinë e kësaj zone të njohur për ujërat e saj të kristalta.
Hekurani, tashmë 70 vjeç, ka filluar punën e tij si fotograf që në vitin 1992 dhe vazhdon ta bëjë këtë çdo mëngjes, pa ndërprerje pavarësisht përparimi të teknologjisë. Aparati i tij fotografik, i blerë në vitin 1990, është miku i tij i besuar për të kapur momente të veçanta të çastit, që i ofron vizitorëve pa i lënë të presin për t’i marrë fotografinë.
“Kam qenë këtu që nga viti 1992 dhe vazhdoj të vij çdo ditë. Turistët që vijnë nga qytete të ndryshme, si Durrësi, Vlora, Saranda, janë shumë të interesuar për foto çasti. Me celular mund të bëjnë foto, por është diçka tjetër ta marrësh fotografinë në moment dhe ta mbash menjëherë në dorë. Kjo është ajo që ofroj”, thotë Hekurani në një intervistë për Euronews Albania.
Pavarësisht zhvillimeve teknologjike dhe dominimit të kamerave dixhitale dhe celularëve, Hekurani ka qëndruar besnik ndaj stilit të tij të fotografisë analogjike dhe ofron një shërbim që, sipas tij, ka një vlerë të veçantë për turistët.
“Unë do ta vazhdoj këtë punë deri sa të kem forcë. Pasi të mos jem në gjendje, atëherë dihet, por derisa mundem, do të vazhdoj. Nëse nuk ke bërë foto çasti, nuk mund të thuash që ke qenë në Drilon,” shton ai me humor.
Përveç se është një fotograf, Hekurani ka fituar statusin e një ciceroni të zonës, duke ndarë me turistët historitë e Drilonit dhe bukuritë natyrore të këtij vendi. Me dhjetëra mijëra fotografi të realizuara gjatë viteve, ai ka bërë që çdo vizitor të mbajë një kujtim të çmuar nga ky vend i mrekullueshëm.
