Policia greke ka sekuestruar një sasi të madhe marijuane prej 215 kilogramësh në zonën e Janinës, duke shkatërruar një rrjet trafiku që dyshohet se kishte hyrë në Greqi nga kufiri i gjelbër. Gjatë operacionit, u arrestuan tre shtetas shqiptarë, përfshirë një grua, e cila po drejtonte automjetin e ngarkuar me drogë.
Ngjarja ndodhi në aksin Janinë-Kozan, ku policia vuri re një automjet të dyshimtë që ndiqej nga një tjetër si eskortë. Kur policia e ndaloi, drejtuesja nuk iu bind urdhrit dhe tentoi të largohej, duke ecur në mënyrë të rrezikshme përmes zonave të Grevenës. Ajo goditi qëllimisht dy automjete policie, duke shkaktuar dëme. Pas një ndjekjeje të gjatë, mjeti u ndalua në Vovousa të Janinës nga efektivët e Departamentit të Narkotikëve dhe njësive O.P.K.E. Brenda automjetit u gjetën 118 pako marijuanë, me peshë totale 215 kg, ndërsa në mjet ndodhej edhe djali i saj vetëm 2.5 vjeç.
Përveç marijuanës, policia konfiskoi makinën, targa greke që i përkisnin një automjeti tjetër, targa origjinale shqiptare të fshehura brenda, një peshore metalike për drogën, 2.7 gram marijuanë dhe tre telefona celularë. Ndërkohë, në Filippei të Grevenës, u arrit të lokalizohej dhe arrestohej automjeti eskortë, ku udhëtonin dy shqiptarët e tjerë; atje u sekuestruan 510 euro dhe dy telefona celularë.
Të tre të arrestuarit do të dalin para Prokurorisë së Shkallës së Parë të Janinës, ndërsa hetimet për zbardhjen e plotë të rrjetit të trafikut vazhdojnë. Që prej javës së kaluar, policia greke ka sekuestruar rreth 700 kg marijuane që dyshohet se vinin nga Shqipëria, me rastet që janë evidentuar në Igumenicë, Janinë, Selanik dhe Kostur. Këto përpjekje tregojnë një intensifikim të luftës kundër trafikut të drogës nga autoritetet greke.
