Të mërkurën u zhvilluan ndeshjet e fundit të raundit të gjashtë në Champions League, me sfidën kryesore Real Madrid – Manchester City në “Santiago Bernabéu”. Pavarësisht përmirësimit të lojës mes kaosit dhe mungesave të shumta, skuadra e Xabi Alonsos u mposht 1–2 nga ekipi i Pep Guardiolës, duke rritur edhe më shumë presionin mbi trajnerin madrilen. Tani, tre ndeshjet e ardhshme pritet të vendosin të ardhmen e tij në klub.
Thierry Henry i del në krah Alonsos
Në këtë moment kritik, Xabi Alonso ka marrë mbështetje nga ish-ylli i Arsenalit dhe Barcelonës, Thierry Henry.
Pas ndeshjes, në analizën e tij për CBS Sports, Henry u shpreh:
“Nuk e di çfarë kërkon të bëjë me topin apo jo, por më duket gjithmonë qesharake që një trajner të jetë në telashe pas vetëm gjashtë muajsh në detyrë. Personalisht, nuk jam dakord me këtë.”
Ai shtoi:
“Por e dini si është në Real Madrid, Barcelona apo klubet e këtij niveli – mund të zgjohesh dhe të dëgjosh lajme të këqija, sepse gjithçka mund të ndryshojë në çdo moment.”
Duke vazhduar, Henry theksoi:
“Nuk mendoj se duhet të vihet në dyshim trajneri. Nëse ke vendosur një trajner në atë pozicion, duhet t’i japësh kohë të tregojë sa vlen. Por siç e keni dëgjuar nga të gjithë – nga Guillem Balague, presidenti, madje edhe Gareth Bale – në Real Madrid duhet të menaxhosh më shumë sesa të stërvitësh.”
Real Madridi tani përgatitet për ndeshjen kundër Deportivo Alaves në La Liga, më pas përballet me Talavera në Kupën e Mbretit dhe sërish me Sevillën në kampionat para pushimit dimëror. Nëse skuadra nuk arrin të reagojë, situata për Alonson mund të rëndohet akoma më shumë.
