Prej disa ditësh Greqia po lufton me flakët. Ministria e Mbrojtjes e vendit tonë, i është përgjigjur kërkesës së vendit fqinj për të ndihmuar në shuarjen e zjarreve.
Nën koordinimin e Agjencisë së Mbrojtjes Civile dhe Mekanizmit Evropian të Mbrojtjes Civile, në operacionet për shuarjen e zjarreve në Greqi do të angazhohen 30 zjarrfikës dhe 5 automjete zjarrfikëse nga Shqipëria.
Mësohet se efektivët zjarrfikës nga Shqipëria do të angazhohen në bazë të nevojave të paraqitura nga vendi fqinj dhe do të qëndrojnë aty deri në stabilizimin e situatës.
“Shqipëria, si anëtare e Mekanizmit Evropian të Mbrojtjes Civile është përherë e gatshme të ndihmojë aleatët dhe partnerët e saj në raste e fatkeqësive natyrore”, thuhet nga Ministria e Mbrojtjes.
Qindra zjarrfikës dhe vullnetarë në jugun e Greqisë kanë luftuar me zjarret masive për tre ditë.
Dy persona kanë humbur jetën, ndërsa zona të mëdha pyjore janë shkatërruar.
Tre avionë për shuarjen e zjarreve me ujë mbërritën nga Italia dhe Kroacia të martën, pasi Greqia kërkoi ndihmë përmes mekanizmit të emergjencave civile të bllokut evropian.
Shërbimi grek i zjarrfikësve tha se më shumë se 400 zjarrfikës, të ndihmuar nga 20 avionë, ishin angazhuar në luftën kundër zjarreve në malet e Korinthisë, në rajonin e Peloponezit.
Autoritetet u shprehën optimiste pasi fronti kryesor i zjarrit ishte shuar, duke lënë një numër të madh zjarresh më të vogla të shpërndara. Megjithatë, mbetet e paqartë nëse ky sukses do të vazhdojë pasi era e fortë rrezikon sërish përhapjen e flakëve./ilirianews