Sipas raportimeve të Indykaila News, trajneri i Chelsea, Enzo Maresca, ka zhvilluar bisedime të drejtpërdrejta me drejtuesit e klubit për mundësinë e një transferimi të bujshëm: Harry Kane.
Mediat pretendojnë se Maresca e konsideron sulmuesin 32-vjeçar si një lojtar me ndikim “monumental” në fushë dhe si element kyç për ta afruar Chelsea-n me trofetë e mëdhenj. Megjithatë, bordi i “Blues” thuhet se është skeptik për shkak të moshës dhe pagës së lartë të anglezit, duke e lënë për momentin idenë “në sirtar”, edhe pse Maresca nuk heq dorë nga dëshira e tij.
Kane u transferua te Bayern Munich në verën e vitit 2023 nga Tottenham për rreth 95 milionë euro. Që prej atëherë, ai ka regjistruar 116 ndeshje, me 109 gola dhe 29 asistime. Kontrata e tij me bavarezët zgjat deri në verën e 2027, ndërsa vlera në treg sipas Transfermarkt vlerësohet 75 milionë euro.
