Gjeto Gjonaj, një 21-vjeçar nga fshati Reç i Malësisë së Madhe dhe pjesë e Policisë së Burgjeve, ka humbur jetën në një aksident tragjik që ndodhi mbrëmjen e djeshme.
Aksidenti ndodhi rreth orës 20:30 në aksin rrugor Koplik – Dedaj, ku Gjonaj humbi kontrollin e automjetit të tij, duke dalë nga rruga. Ai u plagos rëndë dhe ndërroi jetë gjatë transportit për në spital.
Drejtoria e Burgjeve ka shprehur ngushëllimet e saj për humbjen e një djaloshi të ri dhe të talentuar, duke theksuar ëndrrat e tij për të shërbyer në sistemin e drejtësisë.
Postimi i plotë:
“Drejtoria e Përgjithshme e Burgjeve dhe stafi i saj shprehin ngushëllimet më të thella për humbjen e Gjeto Gjonaj, një djalë i ri dhe i talentuar, pjesë e strukturës së Policisë së Burgjeve.
Gjeto, i cili kishte ëndrrat e tij të mëdha për të shërbyer në sistemin e drejtësisë, ndërroi jetë në një moshë shumë të re, duke lënë pas një dhimbje të madhe tek familja dhe të afërmit e tij.
Drejtori i Përgjithshëm i Burgjeve, së bashku me stafin, janë pranë familjes Gjonaj në këtë moment të vështirë, duke shprehur solidaritetin dhe mbështetjen e tyre për këtë humbje të pazëvendësueshme.
Gjeto do të mbetet gjithmonë në zemrat tona si një simbol i përkushtimit dhe shpresës për një të ardhme më të drejtë.
Do të kujtohemi gjithmonë për pasionin dhe dedikimin tënd. Lamtumirë Gjet!”
