Sot, Shqipëria feston 113 vjetorin e shpalljes së Pavarësisë, një ngjarje historike e njohur për të gjithë shqiptarët si Dita e Flamurit. Më 28 Nëntor 1912, Kryetari i Qeverisë së Përkohshme, Ismail Qemali, shpalli pavarësinë e Shqipërisë, duke informuar edhe gjashtë Fuqitë e Mëdha: Anglinë, Italinë, Austro-Hungarinë, Francën, Gjermaninë dhe Rusinë, si dhe vende ballkanike si Rumaninë, Malin e Zi, Serbinë, Bullgarinë, Greqinë dhe Turqinë për këtë zhvillim të rëndësishëm.
Ky akt shpalli Ismail Qemalin si Kryetar të Kuvendit dhe si kryetarin e parë të qeverisë së shtetit shqiptar, dhe përfshiu të gjitha trojet shqiptare, duke emëruar ministra nga të gjitha krahinat. Shpallja e Pavarësisë është rezultati i një periudhe të gjatë luftërash dhe përpjekjesh të shqiptarëve për të mbrojtur territori dhe identitetin e tyre kombëtar. Kuvendi i Vlorës, me këtë vendim, i dha popullit shqiptar të drejtën e tij të pamohueshme për t’u bërë një komb i lirë dhe i pavarur krah kombeve të tjerë evropianë.
Më 28 Nëntor 1912, Shqipëria shënoi një kthesë të rëndësishme, duke përfunduar sundimin pesëshekullor të Perandorisë Osmane dhe duke krijuar kushte të reja për zhvillimin ekonomik, shoqëror dhe kulturor të vendit. Shpallja e Pavarësisë ishte gjithashtu një fitore e madhe kundër politikave antishqiptare të monarkive fqinje, të cilat kishin planeta për copëtimin e territorit shqiptar.
Dita e sotme shfaq rëndësinë e kësaj ngjarjeje për identitetin dhe historinë shqiptare, duke e bërë këtë ditë një moment reflektimi dhe krenarie për çdo shqiptar, pavarësisht nga vendndodhja e tij. Top Channel u uron gëzuar të gjithë shqiptarëve në këtë ditë të shënuar, duke theksuar se shpallja e Pavarësisë është një ngjarje që mbetet në memorien kolektive si një simbol i lirisë dhe unitetit të kombit shqiptar.
