Kosova ka vendosur të mos riaplikojë për anëtarësim në Interpol edhe këtë vit, gjatë sesionit të 93-të të Asamblesë së Përgjithshme që u zhvillua në Marok. Kjo ka ndodhur ndërsa Serbia, nëpërmjet ministrit të Brendshëm Ivica Daçiq, ka njoftuar se do të aplikojë për të hapur një Byro Rajonale të Interpolit në Beograd. Daçiqi ka pretendentuar se Serbia ka mbështetje të konsiderueshme nga vende të tjera të rajonit për këtë nismë dhe se ka ndërmarrë një lobim aktiv kundër anëtarësimit të Kosovës.
Kosova ka aplikuar për anëtarësim në Interpol për herë të fundit më 20 nëntor 2018, por përpjekja e saj dështoi pasi nuk arriti të siguronte shumicën e nevojshme votash. Që nga ajo kohë, Kosova ka shmangur aplikime të reja, duke theksuar se mungesa e shansit për sukses është një faktor vendimtar.
Ish-ministri i Brendshëm Bejtush Gashi kritikoi qeverinë e Kosovës për mungesën e një strategjie diplomatike të qartë, duke e përshkruar këtë si një vakum që Serbia po e shfrytëzon për të forcuar pozitat e saj. Gashi nënvizoi se hapja e Byrosë Rajonale në Beograd do të sjellë një asimetrikë strategjike në rajon, duke pozicionuar Serbinë si qendër të koordinimit policor dhe duke lënë Kosovën në një pozicion periferik.
Mungesa e anëtarësimit të Kosovës në Interpol ka pasoja të mëdha për kapacitetet e saj për të luftuar krimin e organizuar dhe për të bashkëpunuar në nivel ndërkombëtar. Gashi thekson se kjo situatë është për shkak të presioneve politike nga Serbia dhe se Kosovës i duhet një qasje e re në diplomacinë e sigurisë për t’u përballur me këto sfida.
Sidoqoftë, ecuria e marrëdhënieve mes Kosovës dhe Interpolit vazhdon të mbetet e ndikuar nga dinamika të ndërlikuara politike në rajon, përfshirë lobimin e vazhdueshëm të Serbisë, i cili ka penguar përpjekjet e Kosovës për integrim në organizatat ndërkombëtare.
