Muzeu i Luvrit ka vendosur të rrisë çmimin e biletave për vizitorët nga jashtë Zonës Ekonomike Evropiane me 45% nga 14 janari 2026. Bazuar në vendimin e Bordit të Drejtorëve të Luvrit, qytetarët nga jashtë Bashkimit Evropian, Islanda, Lihtenshtajni dhe Norvegjia do të paguajnë 32 euro për hyrjen e tyre, në vend të 22 eurove që kushtojnë sot. Rritja ka të bëjë kryesisht me vizitorët amerikanë, të cilët përbëjnë grupin më të madh të vizitorëve të huaj, por edhe kinezët, të cilët janë në vendin e tretë, sipas raportit të aktivitetit të muzeut për vitin 2024.
Mediat e huaja shkruajnë se në vitin 2023, Luvri priti 8.7 milionë vizitorë, 69% e të cilëve ishin të huaj. Pas vjedhjes spektakolare të 19 tetorit, menaxhmenti i muzeut vlerëson se rritja e biletave do të gjenerojë 15 deri në 20 milionë euro shtesë në vit, një shumë që do të drejtohet për adresimin e problemeve strukturore të institucionit.
Një raport i kohëve të fundit nga Gjykata e Auditorëve paralajmëron se Luvri po përballet me një sërë investimesh të mëdha që nuk është në gjendje t’i financojë, veçanërisht për shkak të mungesës së përparësisë së shumë projekteve” në zhvillim e sipër. Vjedhja e tetorit zbuloi gjithashtu, sipas hetimit administrativ, pajisje të pamjaftueshme sigurie, veçanërisht në lidhje me mbrojtjen e xhevahireve të çmuara mbretërore.
