A22 Sports Management, kompania prapa projektit për Super League evropiane, ka nisur procedurat për kërkimin e një dëmshpërblimi prej 4.5 miliardë eurosh nga UEFA. Kjo është konfirmuar përmes një komunikate të A22, e cila thekson se kërkesa për dëmshpërblim vjen si pasojë e abuzimit të UEFA me pozicionin e saj dominues në tregun e kompeticioneve futbollistike për klube.
Sipas A22, më 21 dhjetor 2023, Gjykata e Madhe e Drejtësisë së Bashkimit Evropian vendosi se UEFA ka shkelur ligjin për konkurrencën duke abuzuar me monopolin e saj. Ky vendim i detyron UEFA-n të hapë tregun për organizatorët si A22. A22 gjithashtu shprehet se, pavarësisht këtyre vendimeve të rëndësishme nga tre gjykata evropiane, UEFA vazhdon të aplikojë rregulla dhe praktika që bien ndesh me përfundimet gjyqësore.
Komunikata vijon duke theksuar se UEFA tani ndodhet përballë rrezikut për të përballuar një kërkesë dëmshpërblimi nga klube dhe A22 për shkak të sjelljeve të saj joligjore. Në dhjetor të vitit të kaluar, A22 kishte kërkuar nga UEFA vazhdimin e projektit Unify League, një propozim për kompeticione të reja panevropiane, në përputhje me vendimin e Gjykatës Evropiane të Drejtësisë. Pas kësaj, A22 nisi bisedime me UEFA për një periudhë prej shtatë muajsh, me qëllimin për të arritur një marrëveshje globale.
Gjatë këtyre negociatave, A22 bëri lëshime të rëndësishme për të zvogëluar diferencën midis propozimit të saj dhe kompeticioneve të UEFA, duke u përqendruar në tri çështje kryesore: përmirësimin e formatit, modernizimin e qeverisjes dhe implementimin e një platforme transmetimi online për të përmirësuar aksesin dhe përvojën e tifozëve. Megjithatë, pavarësisht këtyre përpjekjeve, nuk u arrit ndonjë marrëveshje. Kjo e ka detyruar A22 të marrë hapin e dalje nga negociatat dhe të kërkojë dëmshpërblim për dëmet e pësuara.
