Presidenti amerikan Donald Trump pritet të përballet me një audiencë shumë më skeptike kur të flasë javën e ardhshme në Asamblenë e Përgjithshme të Kombeve të Bashkuara, ndërsa lufta me Iranin hyn në muajin e shtatë.
Në analizën e saj, Reuters shkruan se konflikti nuk ka përfunduar brenda pak javësh, siç ishte parashikuar fillimisht nga Trump, ndërsa objektivat amerikane ndaj programit bërthamor iranian mbeten të diskutueshme.
Irani është dobësuar ushtarakisht dhe ekonomikisht, por vazhdon të kundërshtojë presionin amerikan dhe ka ruajtur aftësinë për të goditur interesat amerikane dhe aleatët e SHBA-së në rajon.
Një problem i ri për Uashingtonin është edhe forcimi i Houthive në Jemen. Grupi ka avancuar përgjatë bregut të Detit të Kuq dhe ka marrë kontrollin e ishujve pranë ngushticës Bab el-Mandeb, një nga korridoret më të rëndësishme të transportit detar në botë.
Situata ka rritur çmimet globale të energjisë dhe ka shtuar presionin mbi ekonomitë europiane dhe aziatike. Shumë prej aleatëve europianë dhe aziatikë të SHBA-së kanë refuzuar kërkesat e Trumpit për t’u përfshirë në konflikt.
Reuters vëren gjithashtu se lufta ka konsumuar rezervat amerikane të raketave dhe ka krijuar një dilemë për administratën Trump: Uashingtoni nuk dëshiron që Houthit të mbyllin një tjetër korridor të rëndësishëm tregtar, por ndërkohë një ndërhyrje e re ushtarake do të rëndonte më tej mbi forcat amerikane.
Zyrtarët amerikanë u takuan me Houthit në Oman gjatë fundjavës. Grupi tha se nuk synon të sulmojë anijet amerikane, ndërsa vazhdon presionin ndaj Arabisë Saudite.
Në fjalimin e tij në OKB, Trump pritet ta paraqesë fushatën ushtarake si një sukses, por Reuters vëren se konflikti është shndërruar në një përballje të zgjatur dhe se objektivat e SHBA-së kanë ndryshuar gjatë rrugës.
