Në ‘sitën’ e SPAK po kalojnë edhe 6 procedurat e tjera tenderuese të Unazës së Madhe, jo vetëm loti i 4-ët, për të cilin janë marrë nën hetim Belinda Balluku dhe vartësi i saj, Evis Berberi. Prokuroria e Posaçme ka dyshime se edhe në këto procedura të tjera tenderuese, Balluku me vartësit kanë paracaktuar kompanitë fituese, ndërsa Balluku dyshohet se ka orientuar garën dhe e ka mbikëqyrur në çdo fazë të saj.
Mësohet se SPAK ka në duar komunikime të Ballukut me vartësit për të gjitha lotet, sidomos me Berberin i cili deri në 2024 mbante postin e kreut të ARRSH. Bisedat janë zhvilluar në disa periudha të ndryshme kohore, nga 2021-2023, por ende nuk janë zbërthyer nga organi i akuzës. Kanë qenë 4 telefonët që i janë sekuestruar Berberit që kanë çuar në zbulimin e këtyre bisedave dhe marrjen e Ballukut të pandehur për Tunelin e Llogarasë.
Unaza e Madhe e Tiranës është projekti më i madh rrugor brenda kryeqytetit, me gjatësi prej 28.7 kilometrash. Për ndërtimin e saj janë prokuruar 45.9 miliardë lekë (450 milion euro). Të gjitha lotet janë fituar me shumë afër fondit limit dhe në shumicën e rasteve janë skualifiuar firmat e tjera garuese.
Burime nga SPAK thonë se pritet të tjerë të pandehur për dosjen Balluku
Përveç Unazës së Madhe, po verifikohen dhe vazhdon hetimi edhe për shumë procedura të tjera prokurorimi.
