Më 16 dhjetor, Athina do të jetë nikoqire e një takimi të rëndësishëm diplomatik mes ministrit të Jashtëm grek, Giorgos Gerapetritis, dhe koleges së tij shqiptare, Elisa Spiropali. Kjo vizitë shënon herën e parë që Spiropali viziton kryeqytetin grek pas marrjes së detyrës. Sipas burimeve të gazetave greke, qëllimi i këtij takimi është hartimi i një “rrugë të re bashkëpunimi” mes dy vendeve, e përqendruar në tre shtylla kryesore: Zonën Ekonomike Ekskluzive (ZEE), energjinë dhe integrimin evropian të Shqipërisë.
Çështja më e rëndësishme në agjendë do të jetë përcaktimi i kufijve detarë dhe ZEE. Të dyja vendet kanë rënë dakord që çdo mosmarrëveshje mbi këtë çështje t’i dërgohet Gjykatës Ndërkombëtare të Hagës, e cila tregon vullnetin e përbashkët për dialog dhe zgjidhje juridike. Spiropali synon të sjellë një dinamikë të re në këtë proces, ndërsa Greqia e sheh marrëveshjen si një mënyrë për të mbrojtur të drejtat e saj detare dhe për të hapur mundësi investimesh në kërkime energjetike.
ZEE përfshin gjithashtu projekte energjetike mes dy vendeve, si gazsjellësit, linjat e interkonjeksionit elektrike dhe infrastrukturat e reja energjetike, të cilat mund të ofrojnë përfitime ekonomike të ndjeshme dhe të rrisin sigurinë energjetike në rajon.
Një tjetër temë e rëndësishme do të jetë integrimi evropian i Shqipërisë. Greqia e konsideron këtë proces si një prioritet strategjik, sidomos në një periudhë që rajoni përballet me tensione dhe sfida të sigurisë. Shqipëria ka shënuar përparime të dukshme në negociatat për anëtarësim dhe synon të përfundojë këto negociata deri në vitin 2027.
Vizita e 16 dhjetorit shihet si një mundësi për të vendosur një kuadër të ri bashkëpunimi që do të sjellë stabilitet dhe më shumë sigurim për të dy popujt. Diplomatët grekë theksojnë se ky është një hap i rëndësishëm jo vetëm për marrëdhëniet dypalëshe, por edhe për sigurinë dhe stabilitetin e tërë rajonit.
