Një 23-vjeçar i identifikuar si, Xhordan Cafi, është arrestuar nga Policia në Lezhë pasi mbante armë zjarri në automjet.
Ai u arrestua në aksin rrugor “Lezhë–Shkodër”, në fshatin Mabë, pasi gjatë kontrolleve në automjetin tip BMW që udhëtonte i riu u gjet një armë zjarri pistoletë, krehër dhe municion luftarak.
Gjithashtu nga kontrollet në banesën e të riut policia thotë se janë gjetur dhe sekuestruar doza kanabisi.
“Si rezultat i operacionit, në aksin rrugor “Lezhë–Shkodër”, në fshatin Mabë, shërbimet e Policisë konstatuan një automjet tip BMW që dyshohej se udhëtonte i riu i armatosur dhe e ndaluan për të ushtruar kontroll.
Gjatë kontrollit fizik të drejtuesit të automjetit dhe të çantës që mbante me vete, shërbimet e Policisë gjetën dhe sekuestruan në cilësinë e provës materiale 1 armë zjarri pistoletë, me krehër dhe municion luftarak.
Në vijim të veprimeve procedurale, në bashkëpunim me shërbimet e DVP Shkodër, u ushtrua kontroll edhe në banesën e tij në lagjen “Salo Halili”, në Shkodër, ku gjatë kontrollit shërbimet e Policisë gjetën dhe sekuestruan një sasi të vogël lënde narkotike, e dyshuar kanabis.
Në përfundim të veprimeve procedurale, u arrestua në flagrancë shtetasi Xh. C., 23 vjeç, banues në Shkodër, për veprat penale “Mbajtja pa leje dhe prodhimi i armëve, armëve shpërthyese dhe i municionit” dhe “Prodhimi dhe shitja e narkotikëve””,- njoftoi Policia.
Materialet procedurale i kaluan Prokurorisë së Lezhës, për veprime të mëtejshme.
