Blue Origin e Jeff Bezos ka lëshuar me sukses raketën e saj të madhe “New Glenn” dhe ka rikuperuar për herë të parë booster-in, duke shënuar një moment të rëndësishëm në garën me SpaceX të Elon Muskut. Dy sondat Escapade të NASA-s janë nisur drejt Marsit dhe priten të mbërrijnë në vitin 2027 për të studiuar ndërveprimin e erës diellore me atmosferën marsiane
Blue Origin ka realizuar fluturimin e dytë të raketës së saj gjigante New Glenn, duke nisur dy sonda drejt Marsit dhe duke arritur për herë të parë rikuperimin e booster-it, një hap kyç në garën hapësinore me SpaceX-in e Elon Musk.
Lëshimi ndodhi nga Cape Canaveral në Florida, pas katër ditësh vonesash për shkak të motit dhe dy pezullimeve të tjera të enjten. Në bord ishin dy orbitues të NASA-s, të quajtur Escapade, që pritet të mbërrijnë në Planetin e Kuq në vitin 2027.
Por suksesi më i madh ishte ulja vertikale e fazës së parë. Booster-i u ul me sukses 600 kilometra larg brigjeve të Atlantikut, mes brohoritjeve të stafit — hera e parë që kompania e Jeff Bezos arrin këtë feat me një raketë kaq të madhe.
Misioni i parë provë në janar arriti të dërgonte një satelit prototip në orbitë, por dështoi në uljen e booster-it. Rikuperimi i sotëm konsiderohet thelbësor për uljen e kostove dhe konkurrencën me SpaceX, që tashmë e ka standardizuar këtë proces.
New Glenn, e quajtur sipas astronautit amerikan John Glenn, renditet ndër raketat më të mëdha aktive, edhe pse më e vogël se Starship-i i SpaceX apo raketat Saturn V të epokës së Hënës.
Dy sondat e NASA-s, të quajtura Blue dhe Gold, do të studiojnë se si era diellore ndikon në mjedisin magnetik të Marsit dhe si kjo kontribuon në humbjen e atmosferës së planetit.
Me rikuperimin e booster-it, Blue Origin bëhet konkurrent i drejtpërdrejtë për misionet shkencore të NASA-s, duke hyrë në një fazë të re të garës hapësinore komerciale.
