Disa ditë më parë, Lionel Messi vizitoi në mënyrë të qetë Camp Nou-in e rinovuar, duke shkuar atje në mesnatë për të shmangur kamerat dhe publikun. Gjatë vizitës, ai shprehu një ndjenjë të thellë mallëngjimi, duke folur për “mungesën e vendit që ndjen me shpirtin e tij”. Kjo ndezi menjëherë spekulime për një rikthim të mundshëm të tij te Barcelona përpara Botërorit të vitit 2026.
Megjithatë, presidenti i Barcelonës, Joan Laporta, reagoi menjëherë për të shuar këto zëra. Në një intervistë për Catalunya Radio, ai mohoi çdo mundësi që Messi të rikthehet si lojtar i klubit.
“Për respekt ndaj Messit, lojtarëve tanë dhe anëtarëve, nuk është koha për të spekuluar mbi skenarë jo realiste,” – deklaroi Laporta.
Presidenti shtoi se, pavarësisht gjithçkaje, Barcelona po përgatit një tribut madhështor për legjendën argjentinase, sapo të përfundojnë punimet në Camp Nou.
“Nuk e dija që po vinte, por Camp Nou është shtëpia e tij. Kur e kuptova, mendova se ishte një gjest i ëmbël – sapo kishte përfunduar darkën dhe vendosi të shkonte me disa miq,” – shpjegoi Laporta.
Ai konfirmoi se klubi do të nderojë Messin me një ceremoni të veçantë në stadiumin e ri, që pritet të ketë kapacitet prej 105,000 tifozësh.
“Ne po punojmë për një tribut të denjë për Messin, që futbolli më i mirë në botë të jetë i pranishëm. Ai e meriton plotësisht këtë nderim,” – theksoi Laporta.
Edhe pse ndjenjat për një rikthim të mundshëm të Messit mbeten të forta te tifozët, drejtuesit e Barcelonës duken të fokusuar në nderimin e tij për kontributin e jashtëzakonshëm që i ka dhënë klubit. Tributi i ardhshëm pritet të jetë një moment emocionues dhe historik për gjithë botën “blaugrana”.
