Instituti i Kosovës për Drejtësi (IKD) ka kërkuar një hetim të plotë penal për të zbardhur paqartësitë që i janë shoqëruar procesit zgjedhor të 9 nëntorit në Mitrovicën e Jugut, ku ka dyshime për manipulime me vota. IKD shpreh shqetësimin se mungesa e transparencës nga Prokuroria e Shtetit dhe Komisioni Qendror i Zgjedhjeve (KQZ) ka sjellë pasiguri dhe ka minuar besimin e qytetarëve në procesin zgjedhor. Ajo thekson se veprimet e deritanishme nuk kanë ofruar prova të besueshme për publikun, çka është thelbësore për ruajtjen e integritetit të zgjedhjeve.
Gjatë verifikimit të votave për kryetar të komunës, janë identifikuar fletëvotime që kanë numra serikë që nuk përputhen me vendvotimet përkatëse dhe fletëvotime pa numër serik. Një fenomen të ngjashëm ka ndodhur edhe në Komunën e Gjakovës, megjithëse në përmasa më të vogla. KQZ-ja ka argumentuar se këto janë “gabime teknike” nga kompania që ka prodhuar fletëvotimet, “CETIS”, por IKD vlerëson se kjo justifikim nuk është i mjaftueshëm për të shuar dyshimet. Vetë KQZ-ja, si organ kushtetues, nuk mund ta delegojë përgjegjësinë te një kompani private, duke e cilësuar këtë si një abstenim nga kompetencat e saj ligjore.
IKD thekson se CETIS ka vetëm përgjegjësi kontraktuale dhe për këtë arsye rasti duhet të hetohet në mënyrë të plotë për të përcaktuar nëse bëhet fjalë për gabim teknik apo manipulum të vullnetit qytetar. Instituti kritikon edhe Prokurorinë Themelore të Mitrovicës, e cila sipas IKD-së ka vetëm noterizuar pozitat e KQZ-së pa ndërmarrë veprime hetimore konkrete. IKD tha se kërkon që Zyra e Kryeprokurorit të Shtetit ta marrë rastin nën juridiksion ose ta transferojë atë në një prokurori tjetër, në mënyrë që të garantohet një hetim profesional, të pavarur dhe transparent. Mos adresimi i këtyre dyshimeve, paralajmëron IKD-ja, rrezikon standardet demokratike dhe besimin e qytetarëve në zgjedhje të lira dhe të ndershme.
