Konvoji i parë autonom ushtarak në Evropë ka përfunduar me sukses demonstrimin e tij të fundit në Spanjë, sipas raportimeve të mediave ndërkombëtare.
Ngjarja u zhvillua në Sevija dhe u financua nga Bashkimi Evropian, si pjesë e një projekti të gjerë inovativ në fushën e mbrojtjes.
Projekti, i quajtur COMMANDS (Convoy Operations with Manned-unManneD Systems), koordinohet nga kompania spanjolle e hapësirës dhe mbrojtjes “Sener” dhe përfshin 21 partnerë evropianë.
Ky program ambicioz është mbështetur me 24.8 milionë euro nga Fondi Evropian për Mbrojtjen.
Sipas drejtuesve të projektit, sistemi COMMANDS synon të bashkërendojë automjetet e komanduar nga njerëz me ato autonome, si në tokë ashtu edhe në ajër.
Kjo do të mundësojë operacione më efikase në mjedise të “pa strukturuara” dhe me sinjale të kufizuara satelitore.
Në testimet e kryera në Spanjë, automjetet u drejtuan nga sistemi Naviground, i zhvilluar nga Sener.
Ky sistem përdor një kombinim të sensorëve, inteligjencës artificiale, mësimit të makinerive dhe rrjeteve 5G, për t’u mundësuar mjeteve të kuptojnë rrethinën dhe të lëvizin në mënyrë të pavarur.
Sener kishte testuar më herët Naviground në mjete të ndryshme ushtarake, përfshirë asistentë logjistikë dhe tanke eksperimentale.
Në një video promovuese, kompania e përshkruan sistemin si “një nga armët e mëdha sekrete” që përmirëson bashkëpunimin dhe shkëmbimin e informacionit mes mjeteve në fushën e betejës.
Kjo teknologji konsiderohet pjesë e planit të modernizimit të sistemeve mbrojtëse evropiane, ku automatizimi dhe inteligjenca artificiale po luajnë një rol gjithnjë e më të rëndësishëm.
Ndërkohë, Komisioni Evropian ka theksuar nevojën për të forcuar zhvillimin e dronëve dhe sistemeve autonome, duke e cilësuar këtë si një boshllëk kritik në kapacitetet e mbrojtjes së BE-së.
Në dokumentet strategjike të saj, Brukseli paralajmëron se industria evropiane e mbrojtjes ende nuk është mjaftueshëm e aftë për të prodhuar këto teknologji me ritme të shpejta dhe në shkallë të gjerë.
