Trajneri gjerman i Barcelonës, Hansi Flick, ka njoftuar stafin e tij teknik se do të largohet nga klubi në fund të këtij sezoni, i lodhur nga presioni i vazhdueshëm dhe mungesa e mbështetjes nga drejtuesit e klubit. Sipas gazetës spanjolle ABC, 60-vjeçari e ka marrë vendimin pas muajsh të vështirë dhe tensione të brendshme.
Flick kishte nisur të mendonte për dorëheqjen që në shtator, megjithëse asnjëherë nuk është ankuar publikisht për kushtet e punës. Rezultatet e përziera dhe situata e ndërlikuar financiare e klubit në merkato kanë shtuar lodhjen e tij.
Gjermani mori drejtimin e Barcelonës në verën e vitit 2024 dhe deri tani ka drejtuar 74 ndeshje, me bilanc prej 54 fitoreve, 8 barazimeve dhe 12 humbjeve. Në sezonin e parë, ai fitoi tripletën spanjolle: La Ligën, Kupën e Mbretit dhe Superkupën.
Megjithatë, këtë sezon, Barça ndodhet në vendin e dytë të La Ligës me 25 pikë dhe në pozitë të vështirë në grupet e Champions League, ku ka humbur ndaj PSG-së, por ka mposhtur Newcastle dhe Olympiacos. Kontrata e Flick-ut zgjat deri në vitin 2027, por çdo shenjë tregon se aventura e tij katalanase do të mbyllet më herët.
