Një ngjarje e rëndë ka ndodhur mbrëmjen e së premtes në qendër të Bushatit, ku një konflikt për motive të dobëta mes dy individëve ka përfunduar me dhunë fisike dhe plagosje të rëndë.
Sipas informacioneve nga Policia e Shkodrës, 56-vjeçari B. Sh., banues në fshatin Mali i Jushit, ka goditur me një mjet prerës (kosore) 39-vjeçarin P. V., duke i shkaktuar dëmtime serioze në kokë dhe trup, si dhe një frakturë në krahun e djathtë.
Ngjarja ka ndodhur në ambientet e një lokali në qendër të Bushatit. Pas marrjes së njoftimit për ngjarjen, shërbimet e Komisariatit të Policisë Vau i Dejës kanë ndërmarrë menjëherë veprime, duke arrestuar në flagrancë autorin e krimit. Gjithashtu, mjeti prerës i përdorur në sulm, kosorja, është sekuestruar si provë materiale.
Ndërkohë, i plagosuri ndodhet nën kujdesin e mjekëve dhe, për fat të mirë, është jashtë rrezikut për jetën.
Materialet procedurale janë referuar në Prokurorinë pranë Gjykatës së Juridiksionit të Përgjithshëm në Shkodër për të vazhduar hetimet dhe për të siguruar që drejtësia të zbatohet.
