Prokuroria e Posaçme ka nxjerrë konkluzionet përfundimtare për shtetasit Ilir Nishanin, Genci Hicka dhe Gerson Tafa të cilët dyshohen se morën ryshfet në cilësinë e inspektorit të Agjencisë së Mbrojtjes së Mjedisit.
Prokurori Behar Dibra kërkoi dënimin me 2 vite burg për Ilir Nishanin, Genci Hicka dhe Gerson Tafa. Dënimi të konvertohet në shërbim prove për një periudhë 3 vjeçare, si dhe të aplikohet “heqja e të drejtës për te ushtruar funksione publike” për 3 vite.
Sipas hetimeve të SPAK, në vitin 2020, këta persona kanë marrë ryshfet në vlerën e 30 mijë lekëve nga dy mjekë Konstandin Balloma dhe Besim Boçi, me qëllim që te mos i gjobisnin për trajtimin e mbetjeve spitalore.
Hetimi i prokurorisë ndaj zyrtarëve të mjedisit nisi pas kallëzimit të dy mjekëve. Çështja ndaj tyre u pushua nga SPAK për shkak të amnistisë, pavarësisht se procedimi u regjistrua ndaj tyre për veprën penale “korrupsion aktiv”.
